Dhaqanka Soomaalida (Af Ingiriis: Culture of Somalia; Af Carabi: ثقافة الصومال) waa hab nololeedka iyo nidaamka dhaqan ee dadka Soomaalida ah; taasi oo ka mid ah luuqadda, cuntada, suugaanta, fanka, farshaxanka, habaynta iyo soo bandhiga heesaha Soomaalida, ruwaayadaha, majaajilooyinka, iyo guud ahaan dhaqanka ay dadka Soomaalida ah ku dhaqmaan meel kasta oo ay joogaan, gaar ahaan inta ku dhaqan Bariga Afrika. Guud ahaan, dhaqanka Soomaalidu waa haybada iyo sharafta u gaarka ah bulsho weynta Soomaalida meel kasta oo caalamka kaga dhaqan yihiin.
Sidoo kale, dadka ku hadla Af Soomaaliga waxay leeyihiin fanka iyo suugaanta aad u heersareeya, qani ku ah aqoon iyo xirfad qoto dheer. In kastoo fanka maanta jira yahay mid aad u da’yar, haddana wuxuu leeyahay waaxyo iyo noocyo aad u badan. Kuwaasi waxaa ka mid ah heesaha qaaciga, qaraamiga, heesaha jaaska, ruwaayadaha, majaajiloyinka, filimaanta, bandhigyada fanka, qoob-ka-ciyaarka iyo guud ahaan madadaalada ku baxda luuqada Soomaaliga.
Dhaqanka Soomaalidu waa mid soo jireen ahaa, kaasi oo jiilal badan iska dhaxleen. Sida taariikhyahanadu sheegeen, wuxuu asal ahaan ka sameeysmay nolosha maalinle iyo xidhiidhka bulshada Soomaalidu la sameeysay bulshooyinka jaarka ah (deriska) iyo cilaaqaadka ganacsi iyo waxbarasho ee deegaanada fogfog. Dhaqanka Soomaalidu wuxuu in badan ku salaysan yahay diinta Islaamka, oo dadka Soomaalida intooda u badan aaminsan yihiin.
Intii uu jiray gumeysiga, waxaa gaashaan u noqday dhaqanka Soomaalida dooxada Nugaal, iyadoo ay sidoo kale kaalin weyn ka ciyaareen dawladdii iyo halgankii boqortooyada 16aad ee Diiriye Guure. Waxaa boqortooyadaas ka mid ahaa abaanduulkii guud ee u adeecay Diiriye Guure, Ismaaciil Mire.
